பசியும் பிணியும்...

ஆஸ்பத்திரி ஒன்றின்
பின்புறத்தில் குவிந்து கிடக்கும்
சிரிஞ்சுகளைப் போல
குவிந்து பெருகிக் கிடக்கின்றன
மனிதர்கள்
உண்டு வீசிய காகிதத் தட்டுகள்..
பசிப்பிணி என்று
அழைப்பது
பொருத்தம் தான் போலும்!

@@@@

நோய்களோடு தொடர்பு படுத்தப்பட்டிருந்தாலும்
ஆஸ்பத்திரிகளுக்கு ஏதோ ஒரு வித அழகு இருக்கிறது..
அது-
நன்றாக தலை சீவி,
சிரித்த முகத்துடன்
தங்கள் உறவுகளுக்கு
சாப்பாடு எடுத்துச் செல்லும்
பெண்களால் கூட வந்திருக்கலாம்


@@@@@

பசிப்பிணி மருத்துவன் இல்லம்
பக்கத்தில்லா தூரத்திலா என்று
பழங்காலப் புலவன் ஒருவன் பாட்டெழுதினானாம்
இப்போதெல்லாம்
புதுவீடு வாங்கும் போது
மருத்துவன் இல்லம் பக்கத்திலா
என்று கேட்கிறார்கள்...

@@@@@

கர்ப்பிணிகளைப் பார்த்தால்
பொறாமையாக இருக்கிறது
ஆஸ்பத்திரிக்கு
வந்தும்
நோயாளி என்ற பட்டம் இல்லாமல்
அம்மா என்ற அடைமொழியுடன் செல்கிறார்கள்

@@@@@

கல்யாணத்தின் போது
பாணிக்கிரகணம் செய்து
உன் கையை விடமாட்டேன்
என்று சத்தியம் செய்த கணவன்
ஆஸ்பத்திரியில் படுத்திருக்கிறான்
அருகில்
குளுக்கோஸ் ஏற்றிய ஊசி
அசையாமல் இருக்க
அவன் கையை அழுத்திப் பிடித்துக் கொண்டு
அவன் மனைவி!


சமுத்ரா